Студијата спроведена на глувци и стаорци - животни кои природно не хибернираат - даде неочекувани резултати.
Познато е дека под одредени услови некои видови цицачи, птици, инсекти, водоземци и риби можат да паднат во состојба наречена торпор. Имено, станува збор за состојба на намалена физичка активност на животните, за да се зачува потребната енергија.
Во тој период има неколку фази низ кои минуваат животните што хибернираат, а забележани се и случаи кога некои од нив мораат повремено да се будат за да се наспијат добро. Не е изненадувачки што научниците сакаат да ја проучат оваа состојба што е можно подобро и да разберат како функционираат телата при торпор, со цел да применат одредени сознанија за луѓе на кои им е загрозен животот или астронаути на кои им е потребна вештачка и безбедна индукција во хибернација.
За да добијат одговор на ова прашање, научниците од Универзитетот Вашингтон во Сент Луис направиле специјални капи со ултразвук кои ги залепиле на главите на лабораториските глувци. Потоа ги вклучиле и ги поставиле да емитуваат ултразвучни бранови во дел од мозокот наречен преоптички дел од хипоталамусот - кој ја контролира телесната температура и спиењето, како и активирањето на хибернацијата.
Се испоставило дека глувците многу брзо отишле во состојба слична на торпор, односно нивната температура, отчукувањата на срцето и внесот на кислород драстично паднале набргу по активирањето на брановите. Меѓутоа, кога сите овие параметри почнале да се зголемуваат, научниците повторно користеле ултразвучни шокови за да ги одржат во опишаната состојба до 24 часа. После тоа без никакви последици и проблеми успеале да се вратат во нормала.
Потоа сето тоа го повториле на стаорци, а заклучокот бил ист - животните кои не можат природно да хибернираат, тоа можат да го направат со помош на ултразвучни бранови. Откритие кое ги поттикнало да размислуваат во насока - како е можно истото да се постигне со луѓето.
„Потребни се дополнителни истражувања за да се утврди безбедноста и изводливоста на овој пристап кај луѓето“, рече биомедицинскиот инженер проф. Хон Чен. „Но, можеме да замислиме астронаути да носат уред сличен на шлем дизајниран да го таргетира регионот на хипоталамусот за да предизвика состојба слична на торпор“.
Тоа веројатно нема да се случи наскоро бидејќи ефектите од долготрајната хибернација врз мозокот сè уште не се доволно истражени. Затоа, пред да почнат да го применуваат овој процес кај луѓето - научниците мора прво да разберат како да го направат тоа без да предизвикаат штета кога станува збор за нивната меморија или емоции.
Резултатите од истражувањето се објавени во списанието Nature Metabolism.
