На шкотскиот фудбалер му паднала леќата од едното око па со ослабен и нерамномерен вид го играл првото полувреме синоќа во Париз.
Норвешкиот стратег откри со какви проблеми се соочил Скот МекТоминeј синоќа за време на дуелот со ПСЖ.
„Скоти првото полувреме го играше со едно око. Тоа беше навистина импресивно бидејќи ја изгуби едната леќа“, рече Оле Гунар Солскјер.
Тие што носат контактни леќи знаат колку голем проблем имал Шкотланѓанецот. Кога во едното око имате леќа која видот ви го прави одличен, а другото ви е без леќа и гледате заматено, тогаш сликата која ја даваат двете очи екстремно се разликува и реалноста ја прави тешка. Дури и подобро би гледале кога би ја извадиле и другата леќа бидејќи нерамномерниот вид создава и главоболка.
На МекТоминеј му паднала едната леќа за време на првите 45 минути, но нема информација кога отприлика се случило тоа и колку време играл со маки. Јасно е дека за време на паузата ставил резервна леќа, а потоа го одигра целиот натпревар.
Неговиот Манчестер Јунајтед приреди вистинска сензација на „Парк де Пренс“ победувајќи го ПСЖ со 1:2.