Сојузот на средношколци преку Меморандум доставен до Петре Шилегов и Данела Арсовска побара кој и да го добие новиот 4-годишен мандат да ги исполни нивните барања за праведен јавен превоз за сите средношколци.
Од Сојузот бараат сите средношколци да имаат еднакви услови, без разлика од типот на училиштето во кое учат, а бесплатниот превоз да биде и низ целата календарска година, не само за време на учебната сезона, односно од септември до почетокот на јуни како што е сега.
„Да се елиминира растојанието меѓу домот и училиштето како услов за добивање право на бесплатен превоз. Јавниот превоз да стане бесплатен и за време на распустите, односно во текот на целата календарска година. Годината има 12 месеци, а не 9. Средношколците не се образуваат само за време на учебната година, а средношколската возраст трае само 4 години и многу е важно во овој период учениците да ги имаат сите придобивки со цел непречено да се развиваат, созреваат и учат согласно нивната возраст и потреби. За таа цел, на официјалните адреси за контакт на двајцата кандидати на потпис им доставивме Меморандум со 6 точки, а од нив бараме да се заложат истите да ги исполнат доколку ја добијат поддршката да управуваат со Градот Скопје“, стои во соопштението.
Додатно, бараат и бесплатен меѓуградски автобуски и железнички превоз ширум земјава за сите средношколци.
„Очекуваме во најскоро време и двајцата кандидати да го потпишат ваквиот Меморандум со што средношколците, нивните родители и професори да може да бидат сигурни дека многу брзо ќе се реши овој децениски проблем на средношколците и нивното користење на јавниот транспорт“.
