Почетокот на европските квалификации за Светското првенство во Катар ни донесе неколку неочекувани резултати и огромни изненадувања.
Имаше особено интересни исходи од земјите од некогашната голема Југославија, пред сè пријатни.
Секоја чест за Хрватска што стана светски вицешампион пред три години, но очигледно е дека веќе не е единствената што игра атрактивен и добар фудбал на овие простори, пишува Милош Симановиќ во неговата анализа за b92.net.
Србија игра симпатично под водство на селекторот Драган Стојковиќ Пикси, Словенија покажа дека може, исто како Црна Гора и Босна и Херцеговина, но најголем хит е Северна Македонија, нагласува тој.
Еликсирот на младоста на Пандев
Симановиќ скока неколку групи за да дојде побрзо до „најголемите херои по три кола - Северна Македонија“.
„Ако фрлите поглед на група Ј се чини дека е наопаку“, шеговито анализира Симановиќ и продолжува дека „Македонците приредија сензација во Дујсбург со победа над Германија“ и „беа убедливи со Лихтенштајн (5:0), со несреќен пораз во Романија во самиот финиш, иако се вратија од ‘мртвите’ по два гола заостанување.“
„Тимот на Игор Ангеловски го живее сонот, започна со историскиот пласман на ЕУРО, предводен од ветеранот Горан Пандев. Најголемиот македонски фудбалер во овој милениум ја доживува својата втора младост на 38-годишна возраст, толку многу што не му е туѓо да решава натпревари на највисоко ниво како во Германија. И покажаа дека нема да бидат ‘топовско месо’ на ЕУРО, како што некои предвидуваа“, не штеди пофалби Симановиќ.
Целата анализа може да ја прочитате ТУКА.
