Сојузот на синдикати на Македонија (ССМ) во недела ќе излезе на протест пред Собранието и пред Стопанската комора на Северна Македонија изразувајќи незадоволство од неизгласувањето на законското решение со кое недела се прогласува за неработен ден и со барање минималната плата да изнесува 60% од просечната плата, а со тоа и спирално зголемување на сите останати плати согласно колективните договори.
Претседателот на ССМ Дарко Димовски во изјава за МИА вели дека со неизгласувањето на законот за недела неработен ден, кој требаше да почне од 1 октомври, 92% од работниците не одмараат во недела, а 8% од работниците кои работат во дејности каде не може да прекине работниот процес, не земаат 50% поголема дневница за работа во недела.
– Револтирани сме од односот на пратениците. Законот недела да биде неработен ден, кој требаше да важи од 1 октомври, не е изгласан. Со тоа, 92% од работниците не одмараат во недела, а 8% кои работат во дејности каде процесот не може да прекине, не може да земат 50% зголемена дневница. Работниците во моловите кои треба да работат само од 10 до 18 часот, не земаат дневница зголемена за 100%. Исто така, по основ на данок за работа во недела, во Буџетот на РСМ не се влеваат даночни средства во износ од 3% со кои треба да се изградат нови градинки за нашите деца, посочува Димовски.
Барањето за минималната плата и спиралното зголемување на останатите плати, ССМ го темели на најавите за пораст на цената на струјата од јануари и на зголемените цени на прехранбените производи.
– Поради економската криза предизвикана од пандемијата и најавената енергетска криза каде РКЕ кажува дека од 1 јануари ќе се зголеми цената на струјата за минимум 20%, бараме минималната плата да изнесува 60% од просечната плата или 18.000 денари, а сите останати плати да растат скалесто согласно колективните договори, истакнува Димовски.
Дел од барањата на синдикатот се и враќање на правото за регрес на годишен одмор за сите работници во Општиот колективен договор за јавен сектор и пензионирање по неколку основи – за жени со 35 и за мажи со 40 стаж, без разлика на нивната возраст, потоа пензионерирање по основ на дејности, предвремена пензија со 60 години старост и 15 години стаж кога работникот кој не се чувствува физички способен, да зема минимум 70% од пензијата додека не ги исполни условите за целосна пензија.
Протестот ќе почне во 12:12 часот пред зградата на ССМ по што ќе продолжи пред Собранието и пред зградата на Стопанската комора на Северна Македонија.
Доколку не се исполнат барањата, синдикатот најавува генерален штрајк.
