Екипите на Струга и Македонија ЃП по денешните полуфиналнни натпревари изборија пласман во големото финалето на Купот на Македонија.
Струга полуфиналната жрепка ја одреди како домаќин на дуелот со Силекс и стружани ја искористија предноста од домашната публика. Благодарение на голот на десниот бек Меџит Незири постигнат во 65-тата минута за прв пат во својата кратка историја овој млад клуб ќе игра финале.
Силекс беше финалист во минатите две изданија, а денеска пропушти прилика да врзе три финалиња во низа. Лани на пенали загуби, додека преклани го крена пехарот, исто така на пенали.
На другото полуфинале играно во Тетово беше повозбудливо. Шкендија и Македонија ЃП одиграа 1:1 по регуларните 90 минути, по што победникот мораше да се одлучи со изведување на пенали (согласно правилата не се играат продолженија од двапати по 15 минути). Гостите од скопската населба Ѓорче Петров поведоа во 12. минута преку дефанзивецот Есмин Личина, а домашните израмнија во 65-тата преку бугарскиот напаѓач Наско Ленков Милев.
Во пенал-рулетот имаше многу промашувања. Шкендија шутираше прва и веднаш промаши откако Христијан Стевковски го одбрани ударот на Ералд Чинари. Во втората серија Личина го префрли голот, а Шкендија имаше можност да поведе кога Давор Талески го одбрани ударот на Бразилезот Јагу да Силва, но веднаш потоа Љупчо Дориев пласираше крај десната статива. Пенал-рулетот влезе во шестата серија каде Камер Ѓака ја затресе пречката, а потоа Адама Самаке беше сигурен реализатор праќајќи ги „Лавовите“ во ново финале.
Македонија ЃП е всушност бранител на тронот откако лани на пенали го победи Силекс. За разлика од Струга која е прв пат во финалето, „Лавовите“ по петти пат се најдоа таму, а ќе го бркаат третиот пехар. Затоа, пак, Струга е во игра за двојната круна со оглед на тоа што љубоморно го чува врвот во 1.МФЛ.
Финалето ќе се игра кон крајот на мај.