И тоа како несекојдневна ситуација се случила на пријателски натпревар помеѓу чешката Славија и полскиот Раков, играна во Австрија.
Во 10-тата минута од натпреварот, дел од летните подготовки на двете екипи, локалниот главен судија му доделил црвен картон на Гркот Јанис Папаниколау од Раков, по што полската екипа на самиот почеток станала со играч помалку. Воопшто не им се допаднало пријателска да играат со десетмина, па почнале да се расправаат со судијата.
Судијата, видно изнервиран од реакцијата на Полјаците, заедно со помошниците го напуштил теренот откажувајќи се од понатамошно судење на натпреварот.
Така, само што се испотиле, двете екипи останале без судиската тројка и не можеле да го продолжат натпреварот, па морале да бараат алтернативни решенија.
Бидејќи е клупски пријателски натпревар, а таквите ФИФА не ги контролира, за разлика од пријателските помеѓу репрезентации, можеле да си дозволат експерименти.
Како главен судија истрчал на помош тренерот на Раков, а помошници му биле двајца резервни играчи на клубот од Прага.
Како-така натпреварот го дочекал својот крај, а победата од 2:1 ја однеле Чесите, со тоа што самите ги постигнале сите три гола. За водство на Раков автогол си постигнал Нигериецот Мухамед Тиџани, а потоа два гола за Славија постигнал Холанѓанецот Мик ван Бурен. Црвениот картон за играчот на Раков бил поништен штом натпреварот продолжил, па Полјаците доиграле комплетни, а Папаниколау бил заменет на полувремето.
