Топката со која Диего Марадона ги постигна веројатно двата најпознати голови во фудбалската историја во полуфиналето меѓу Аргентина и Англија на Светското првенство 1986 во Мексико синоќа се продаде на аукција во Лондон за два милиона фунти.
Аргентина, која подоцна стана и светски првак, ја совлада Англија со 2:1, а Марадона првиот гол го постигна со рака, додека вториот кога од средина на теренот во слалом нанижа петмина противнички играчи, заобиколувајќи го притоа и голманот Питер Шилтон, пред да ја смести топката во празниот гол.
Првиот гол новинарите го нарекоа „Божја рака“, алудирајќи на изјавата на аргентинскиот фудбалер дека голот „делумно бил постигнат со главата на Марадона и малку со помош на Божја рака“, додека вториот беше прогласен за „Гол на векот“.
Топката досега беше во сопственост на Тунижанецот Али Бин Насер, кој беше главен судија на тој натпревар.
„Оваа топка е дел од фудбалската историја. Вистинско време е да ја споделиме со светот“, изјави Вин Насер, сега милионер.
Пред аукцијата беше проценето дека топката би можела да достигне цена меѓу 2,5 и 3 милиони фунти.