Поранешниот американски претседател Доналд Трамп ги критикуваше американските Евреи поради „недоволно благодарност“ за неговата политика кон Израел, предупредувајќи дека мора да се „освестат“ пред да „биде предоцна“.
Оваа изјава Трамп ја објави на неговата социјална мрежа Truth Social, а многумина ја окарактеризираа како антисемитизам бидејќи сугерира дека американските Евреи имаат двојна лојалност кон САД и кон Израел. Изјавата веднаш предизвика осуда од еврејската заедница.
„Ниту еден претседател не направил за Израел повеќе од мене“, порача Трамп пред да изјави дека е изненадувачки тоа што „нашите прекрасни евангелисти повеќе го ценат тоа од Евреите, особено оние кои живеат во САД“.
Џонатан Гринблат, кој е дел од организација што се бори против антисемитизам, му порача на Трамп дека не треба тој да држи лекции за односот меѓу САД и Израел.
„Овој однос почива на заеднички вредности и сигурносни интереси. Ова повикување на Евреите е навредливо и одвратно“, порача тој.
Во интервју минатиот декември, Трамп тврдеше дека американските Евреи или не го сакаат Израел или не им е грижа за него, а исто така и тогаш тврдеше дека евангелистите „повеќе го сакаат Израел од Евреите во оваа иста земја“.
Истражување на Pew Research, објавено во 2021 година, покажа дека 45% од возрасните Евреи во САД сметаат дека грижата за Израел е „важна“ за тоа што значи да се биде Евреин, а 37% сметаат дека е „важна, но не и битна“. Само 16% рекле дека грижата за Израел за нив „не е важна“.
