Претседателот на САД, Доналд Трамп, е еден од оние политички и јавни ликови кои длабоко ја делат јавноста на екстреми.
Неговите ставови и политики или наидуваат на потсмев и неверување или на овации и одобрување до степен на култно обожавање.
Но, додека САД подлабоко тонат во здравствена криза предизвикана од пандемијата со COVID-19, за која тој самиот сноси огромен дел од одговорноста, Трамп реши да отвори нова контроверзна тема.
Пред симпатизерите на митинг во Њу Хемпшир Трамп сериозно рече дека неговата ќерка Иванка е поквалификувана да биде првата жена претседател на САД во споредба со демократката Камала Харис која е номинирана за потпретседател на кандидатот Џо Бајден.
„И јас сакам да ја видам првата жена претседател, но не да дојде на таа позиција како Харис која не е компетентна“, рече Трамп.
„Сите кажуваат дека ја сакаат Иванка“, рече Трамп покажувајќи кон толпата симпатизери во која ретко кој носеше заштитна маска.
„И ги разбирам“, рече Трамп и додаде дека Харис „не е од оние жени кои ќе се запишат во историјата со тоа дека станале првата жена претседател“.
А која е Камала Харис, во споредба со „татината ќерка“ Иванка Трамп?
Камала Харис е првата Афроамериканка која една од двете водечки партии ја кандидирале за потпретседател во историјата на САД.
Харис, сенаторка од Калифорнија, беше именувана од претседателскиот кандидат на Демократската партија, Џо Бајден. Таа е четврта жена што досега ја кандидирала Демократската партија. Претходно сите три изгубиле – две како кандидатки за потпретседател, а Хилари Родам Клинтон изгуби како ривал на актуелниот претседател Доналд Трамп.
Камала Харис (55) и сама се кандидираше за претседателска номинација од Демократската партија пред да го поддржи Бајден.
Кога беше избрана во Сенатот во 2016 година беше само втората афроамериканска сенаторка во историјата на Горниот дом на американскиот Конгрес.
Пред да биде избрана за сенаторка беше главен државен обвинител во Калифорнија.
Харис преку социјалните мрежи порача дека ѝ е чест што е номинирана и дека Џо Бајден може да ги обедини Американците.
Позната е по директните и остри прашања, особено за време на истрагата за потврда на кадидатурата на Брет Кавано за врховен судија.
Нејзината кандидатура за потпретседателка би можело да придонесе за поголем одзив кај афроамериканските гласачи кои се најлојално гласачко тело на Демократската партија.
Претседателот Доналд Трамп е изненаден што неговиот противкандидат Бајден ја избрал Камала Харис за своја кандидатка за потпретседател, бидејќи, како што изјави, таа била многу лоша кон Бајден за време на дебатите.
Трамп рече дека Харис била „многу, многу непријатна“ кон Бајден за време на внатрепартиските избори на демократите.