Германскиот фудбалски стручњак Томас Тухел синоќа официјално беше назначен за нов тренер на Челси.
47-годишниот Германец го наследи Френк Лампард кој беше отпуштен завчера, и потпиша договор на 1,5 година со опција за продолжување на соработката за дополнителна година.
Тухел стана 13-ти тренер во ерата на Роман Абрамович, и ќе видиме дали тој број ќе биде среќен за него или ќе ја доживее судбината на тренерите кои беа отпуштени од богатиот Русин пред истекувањето на договорот.
Тој се соочува со тешка задача во Челси. Клубот е на деветтото место на табелата, со 11 бодови заостанување зад лидерот и пет бода заостанување во однос на местото кое води во Лигата на шампиони.
Тухел ја заврши играчката кариера на 25-годишна возраст поради повреда на коленото и веднаш се посвети на тренерската работа. Работеше во младинските категории на Штутгарт, а потоа го презеде резервниот тим на Аугсбург.
Неговиот брз тренерски подем започна во 2009 година кога го наследи Јирген Клоп на клупата на Мајнц.
Шест години подоцна, тој повторно го наследи Клоп, овој пат во Борусија Дортмунд, а во 2018 година го презеде ПСЖ. Во декември минатата година беше отпуштен од парискиот клуб поради коментари кои не ѝ се допаднаа на управата.