Uber соопшти дека спроведува истрага за инцидент поврзан со сајбер безбедноста откако се појавија информации за хакирање на интерни системи на компанијата.
Станува збор за хакерски напад извршен од 18-годишник кој добил администраторски пристап до алатите на компанијата вклучувајќи ги и Amazon Web Services и Google Cloud Platform.
Според New York Times, Uber изгасил неколку интерни системи вклучително и Slack додека го истражува случајот. Засега од компанијата не одговараат на новинарски прашања, но преку Twitter ја потврдија информацијата дека истрагата е во тек и соработуваат со полицијата.
Хакерот наводно им се „јавил“ на вработените во Uber така што објавил порака во интерниот Slack систем. Потоа навел доверливи информации за компанијата со хаштаг дека Uber не ги плаќа доволно своите возачи.
Многумина од вработените на почетокот мислеле дека станува збор за шега, па дури и на објавата од хакерот реагирале со различни емотикони. Вработените имале интеракција со хакерот, верувајќи дека сето тоа е шега.
За New York Times, хакерот потврдил дека има 18 години и дека ја хакирал компанијата од чиста забава, како и дека размислува за објавување на изворниот код на компанијата.
