Украина побара од парламентот да прогласи вонредна состојба од 30 дена поради воената напнатост со Русија на источната граница, соопшти Олексиј Данилов, секретар на државниот совет за национална безбедност.
Тоа значи дека може да се воведе полициски час и да им се нареди на граѓаните да останат дома.
Украина веќе почна да ги регрутира резервистите на возраст од 18 до 60 години. украинското министерство за надворешни работи ги предупреди Украинците да не патуваат во Русија и ги повика своите граѓани кои се веќе таму, да ја напуштат таа земја.
Парламентот во Киев одобри санкции против 351 Русин, односно за застапниците кои гласаа за признавање и испраќање руски војници. Ним им е забранет влезот во Украина, пристап до имотот, капиталот, недвижнини и дозволи за вршење деловни активности.
„Мораме од советот да побараме веднаш да се воведат санкции против криминалците, против сите парламентарци во Думата кои гласаа за распарчување на Украина“, изјави Ирина Херашченко од партијата Европска солидарност.
Санкциите формално ги воведува украинскиот совет за одбрана и национална безбедност.
Минатата недела 351 руски застапници побараа од претседателот Владимир Путин да ја признае независноста на двете самопрогласени републики на истокот на Украина, контролирани од проруски сепаратисти. Путин тоа го направи во понеделникот.
Украинскиот парламент денеска изгласа и закон со кој на Украинците им се овозможува да носат оружје во самоодбрана.