Претседателот на Србија, Александар Вучиќ, синоќа по седницата на Генералното собрание на Обединетите нации, на која се изгласа Резолуцијата за геноцидот во Сребреница, изјави дека „ја заврши кариерата и дека многу работи нема да му простат“, пишува Nova.rs.
„Вечерва овде ставив крај на кариерата. Нема да ми простат многу работи, ова беше клинец во ковчегот. Направив сè, тие направија сè за да нè понижат, а ние се искачивме на височините. Не можам да кажам дека победивме затоа што такви се процедурите, но на сите им е јасно каков е резултатот“, рече Вучиќ во обраќањето пред новинарите во Њујорк.
Вучиќ рече дека наводните проценки на оние кои ја предложиле Резолуцијата се дека повеќе од 110 земји ќе гласаат за неа, а ќе има околу 45 воздржани.
„И бевме 107 (оние кои гласаа против и оние кои беа воздржани). Тоа значи дека 84 од нив против 107 од оние кои не сакаа да се согласат со нивниот предлог, а не зборуваме како се дојдени до тие 84, бидејќи реално, за резолуцијата гласаа околу 60 луѓе, останатите притискаа“, рече претседателот на Србија.
Тој им се заблагодари на сите земји кои гласаа против и воздржани за време на гласањето.
„Огромна благодарност до унгарските браќа, тие се единствените кои беа против во нашата средина, но и благодарност до Словачка, Грција и Кипар кои беа воздржани и покажаа пријателство кон Србија“, рече Вучиќ.
„Имате најмалку три земји кои беа принудени, а на крајот беа воздржани. Неверојатно е какви притисоци имаше и што направија... Ова е прв пат да се случи тоа да не биде едногласно“, додаде тој. Вучиќ рече и дека во наредниот период ќе разговара со Бошњаците во Србија. „Имаме една земја и мораме заедно да се бориме за иднината“, изјави тој.
