Поранешниот капитен на аргентинската репрезентација, Хавиер Занети, денеска изјави дека Лионел Меси не е најдобриот играч на сите времиња, пренесуваат медиумите во Буенос Аирес.
Меси пред три дена ја освои титулата светски шампион со Аргентина на Светското првенство во Катар. Аргентина во финалето ја победи Франција по подоброто изведување пенали.
Некои аргентински медиуми објавија дека Меси сега е најдобар играч на сите времиња и истакнуваат дека го надминал сонародникот Диего Армандо Марадона, кој со репрезентацијата триумфираше на Мундијалот 1986 година во Мексико.
Сепак, Занети не мисли така.
„Меси не го победи Марадона. Не ми се допаѓаат тие споредби. Мислам дека треба да бидеме благодарни што двајца од најдобрите играчи во историјата на фудбалот доаѓаат од нашата земја. Мислам дека Меси нема да се промени. Тој само стана поискусен и тоа му го пренесе на тимот“, рече Занети.
За аргентинската репрезентација Занети играше од 1994 до 2011 година.
„Репрезентацијата ни пружи големи емоции, бидејќи долги години ја чекавме оваа титула. Овој тим ги исполни соништата на милиони аргентински навивачи ширум светот. Тоа беше одлично финале, кое ќе го паметиме засекогаш“, изјави Занети кој моментално е потпретседател на калчолигашот Интер.