Украинскиот претседател Володимир Зеленски изјави дека не гледа повлекување на руските трупи од границата на двете земји, и покрај најавите на Москва за делумно повлекување.
„Не гледаме никакви промени. Гледаме само движење на трупите, чиј број не се промени во последните недели“, изјави Зеленски на видео конференција.
Тој додаде дека видел „мали ротации“ на руските сили.
Во меѓувреме, САД тврдат дека Русија распоредила уште 7.000 војници на границата со Украина. Неименуван висок функционер на американската администрација за AP изјави дека Русија продолжува да шири лажни тврдења кои може да ги искористи како лажен изговор за инвазија. Тој не наведе никакви докази за овие тврдења.
Руското министерство претходно соопшти дека повлекува дел од војниците по воените вежби кои предизвикаа страв од непосредна инвазија на Украина, а како доказ објави видео како силите наводно го напуштаат Крим.
Генералниот секретар на НАТО Јенс Столтенберг изјави дека Алијансата исто така не видела повлекување на руските сили.
