Вечерва големиот Реал Мадрид гостува во Бергамо, на Зидан му фалат еден куп повредени играчи, а противник е забрефтаниот тим на Аталанта.
„Знаеме каков натпревар нѐ чека и свесни сме од што доаѓаме. Работевме добро, се концентриравме и мораме да се избориме за добар резултат“, вели Зинедин Зидан.
Реал секоја година е меѓу потесните кандидати за титулата. Клубот е апсолутен рекордер по бројот на титули во Лигата на шампиони, вкупно 13, а последната му е од сезоната 2017/18.
„Го имаме потребното искуство и нашите надежи се дека ќе стигнеме до финалето. Имаме секаква намера тоа да го оствариме, тоа е она кон кое цели Реал Мадрид: излегуваме на терен за да победиме. Има и реванш, но сега мислиме на овој натпревар“.
Реал влегува во овој натпревар по една мини-победничка серија од 4 натпревари, но е во голема криза поради бројот на повредени играчи. Отсуствуваат Серхио Рамос, Марселу, Дани Карвахал, Еден Азар, Едер Милитау, Родригу, а последен на листата се стави и Карим Бензема.
„Не го познаваме многу добро противникот и поради тоа мора да ја играме нашата игра, но истовремено и да се прилагодуваме на стилот на игра на Аталанта. Тие се премногу офанзивен тим, сличен на оној на Ајакс од пред некоја година. Имаат одлични индивидуалци, солидни се, па очекувам да биде еден прекрасен фудбалски натпревар“.
Стратегот на Аталанта, Џан Пјеро Гасперини, синоќа рече дека посакувал Зидан да биде на терен и да игра наместо да го предводи тимот од клупата.
„Не, завршив јас со играње“, смеејќи се вели Зидан. „Гасперини направи одлична работа. Тој беше тренер на младинскиот тим на Јувентус кога јас бев таму. Навистина ми се допаѓа како тренер“.
Ова е прв дуел на овие два тима кои никогаш претходно се немаат сретнато.
„Аталанта се докажа на теренот, смени два-три играчи сезонава за уште повеќе да го подобри тимот. Ќе биде тешко, но ние мораме да покажеме дека сме силен тим. Свесни сме дека минуваме низ тежок период и притисокот е силен на секој натпревар, но никој натпревар не е лесен“, заврши популарниот Зизу.
Натпреварот почнува во 21 часот на „Гевис“ стадинот во Бергамо, а правдата ќе ја дели германскиот арбитар Тобиас Штилер.
