Штафетите на Канада во женска и на Норвешка во машка конкуренција беа најбрзи во денешните натпревари во брзо лизгање потера екипно, додека Норвежанецот Грабак го освои златото во нордиска комбинација.
Канаѓанките во финалето беа побрзи од Јапонките поставувајќи нов олимписки рекорд од 2:53,44 минути, или 11,03 секунди подобри од ривалките. Во дуелот за бронзата, Холандија беше поуспешна од Русија.
Во машкото финале, Норвешка со време 3:38,08 минути беше поуспешна од Русија (3:40,46). Третото место и бронзениот медал им припадна на репрезентативците на САД кои беа побрзи од Јужна Кореја.
Норвежанецот Јерген Грабак го освои златото во нордиска комбинација. Второто место го зазеде неговиот сонародник Јенс Лурос Ефтебро, додека подиумот го комплетираше Јапонецот Акито Ватабе.
Триесетгодишниот Грабак стана трикратен олимписки шампион. На Игрите во Сочи во 2014 година освои два златни медали, а има сребро од Пјонгчанг 2018 и сребро од тековната Олимпијада во Пекинг.
Норвешка со 12 златни медали е убедливо на првото место во поредокот на земјите освојувачи на одличја на ЗОИ 2022. Следуваат Германија со 8, САД 7 и Австрија, Холандија и Кина со по 6. Кога станува збор за вкупниот број медали, Норвешка и тука води со 26 пред Русија со 20.
