Ерлинг Холанд постигна два гола на првиот меч на Манчестер Сити против Барнли (3-0) во Премиер лигата.
Холанд ги постигна двата гола во првите 45 минути, но Пеп Гвардиола беше многу лут на норвешката ѕвезда на полувремето. На пат кон соблекувалната, Гвардиола го фати за рака Холанд и му се развика.
По натпреварот беше откриено зошто Гвардиола го направил тоа. Во една ситуација кон крајот на првото полувреме Холанд ја побара топката од Бернардо Силва, но Португалецот реши да го забави нападот, поради што Холанд бурно реагираше на теренот.
„Се трудам да бидам сконцентриран секој ден и секогаш нагласувам дека е задоволство да се работи со Пеп. Морам да продолжам да се развивам бидејќи сè уште сум млад. Мислам дека нема подобар тренер од кој да се учи. Инцидентот се случи по последната акција на полувремето затоа што малку му се налутив на Бернардо затоа што не ми додаде, па Пеп ми се налути“, изјави Холанд по натпреварот.
Гвардиола рече: „Постојано сака само нему да му додаваат топка. Постојано сака да проигрува во простор. Ерлинг ја сакаше топката, но Бернардо донесе добра одлука. Тој постигна два гола, верувам дека е среќен.“