Меѓународната агенција за тестирање (ITA) потврди дека 15-годишната Русинка која се натпреварува во уметничко лизгање, Камила Валиева, имала позитивен допинг-тест кон крајот на 2021 година.
Руските медиуми објавија информација дека Валиева паднала на тестирање пред почетокот на ЗОИ во Пекинг, по што Русија освои екипно олимписко злато откако Камила се запиша во историјата со изведба на два четворократни скока, пишува CNN.
Валиева, која им помогна на Русите да освојат злато на натпреварот во уметничко лизгање во понеделникот, ѝ е дозволено да се натпреварува и покрај падот на допинг-тестот бидејќи руската антидопинг агенција (РУСАДА) ја укина привремената суспензија на лизгачката за да може да се натпреварува.
Меѓународниот олимписки комитет сега се залага овој проблем што е можно побрзо да се реши и тоа пред 15 февруари, кога руската лизгачка треба да настапи во поединечни натпреварувања.
Ако Русинката биде дисквалификувана, златото ќе замине за САД, среброто за Јапонија, а бронзата за Канада.
Претходно, руските медиуми пишуваа дека во крвта на руската натпреварувачка е пронајден триметазидин, лек што се користи за спречување напади кај ангина пекторис и кај вртоглавици, но и ја зголемува издржливоста и го подобрува протокот на крв.
