Околу 100.000 фанатични аргентински навивачи потпишаа петиција срцето на легендарниот Диего Марадона да биде дел од нивната репрезентација на претстојното Светско првенство во Катар.
Петицијата ја објавија во јавноста преку ПР и маркетинг агенции и истакнаа дека тоа е засега само нивен сон кој сакаат да го пренесат на сите Аргентинци.
„Сакаме да го постигнеме она што сметаме дека ќе биде негова желба, сакаме срцето на Марадона да патува со Аргентина во Катар. Сакаме тој да биде со националниот тим цело време, во тренинг кампот, хотелот, автобусот, соблекувалната, на терен... И ако сака Господ, и Диего, седум натпревари подоцна неговото срце ќе стигне до долгоочекуваниот трофеј од Светското првенство“, порачаа навивачите.
Марадона, еден од најдобрите фудбалери на сите времиња, почина во 2020 година од срцев удар и беше погребан без најважниот орган.
Неговото срце тежело половина килограм или 200 грама повеќе од вообичаено, па затоа било проучено.
Срцето на Марадона денеска го чува полицијата во Буенос Аирес, а останува да се види дали на крајот навистина ќе биде со Меси и друштвото во Катар.
