Фудбалската репрезентација на Бразил синоќа импресивно ја совлада Јужна Кореја со резултат 4:1 и избори четвртфинале на Светското првенство против Хрватска.
Бразилците славеа со головите на Винисиус, Нејмар, Ришарлисон и Пакета во првите 36 минути од мечот, а особено беа мотивирани бидејќи сакаа да победат на „јога бонито“ начин поради Пеле.
Легендарниот Пеле беше примен во болница на 30 ноември и е во тешка состојба, но пред натпреварот испрати инспиративна порака до фудбалерите на Бразил.
Пеле објави фотографија од Шведска во 1958 година и напиша:
„Шетав по улиците во 1958 година и мислев како ќе го исполнам ветувањето што му го дадов на татко ми. Знам и дека многумина од вас дадоа слични ветувања и сакаат да го освојат своето прво Светско првенство. Ќе го гледам натпреварот од болница и јас ќе навивам за вас. Среќно!“, напиша Пеле.
Кога започна натпреварот, бразилските навивачи развиорија голем транспарент на трибините со ликот на Пеле и порака за брзо закрепнување, а по последниот судиски свиреж фудбалерите на свој начин му дадоа поддршка на најголемиот Бразилец во историјата.
Фудбалерите на теренот донесоа транспарент со фотографијата на Пеле и едноставна порака – „Пеле!“.
„Тешко е да се зборува за Пеле во моментов, но му посакуваме сè најдобро и се надеваме дека ќе биде подобар што е можно побрзо. Се надевам дека уживаше во нашата победа“, изјави Нејмар, а Винисиус додаде:
„Сакам да упатам голем поздрав до Пеле. Оваа победа е за него. Се надевам дека ќе биде подобар, дека ќе се извлече и дека ќе ја освоиме титулата за него“, изјави напаѓачот на Реал.
Бразил во петок со почеток од 16 часот во четвртфиналето ќе игра против Хрватска.
