Иако не сакаше да ги именува луѓето кој ги прозва, Бритни Спирс вчера одлучи јавно да испрати порака до поединци кои „предоцна ја поддржаа во борбата“.
На крајот на јуни годинава, Бритни Спирс одлучи да го прекине долгогодишниот молк на судското рочиште во врска со нејзиното т.н. конзерваторство (целосно старателство) и потоа сведочеше против нејзиниот татко кој веќе 13 години има целосна контрола врз неа и нејзиниот имот.
После тоа, таа беше поддржана од голем број познати личности, но и од неколку членови на нејзиното семејство. Пејачката за прв пат зборуваше за моралната поддршка која ја доби во последниве месец дена.
„Нема ништо полошо од ситуација кога вашите најблиски, кои никогаш не биле таму за вас, одеднаш зборуваат и ви даваат јавна поддршка. Нема ништо полошо од тоа! Како се осмелија да кажат нешто? Дали воопшто се обидоа да ми помогнат тогаш кога очајно ми требаше? Како може само сега јавно да кажеш колку ти е гајле? Зошто не ми даде подадена рака кога се давев?“, напиша Спирс во објава на Instagram.
Додаде и дека луѓето на кои им е испратена пораката сигурно ќе се препознаат и не сака да ги именува поединечно: „Ако сакате да објавите нешто, нека биде нешто правилно и искрено. Вие сте далеку од она што навистина го кажавте и објавивте“.
И покрај тоа што не е јасно кому му се обраќа пејачката, голем број нејзини пријатели претпоставуваат дека тоа е нејзината сестра Џејми Лин Спирс, која на почетокот на овој месец пишуваше за оваа ситуација на својот профил на Instagram.