Цените на нафтата на меѓународните пазари денеска се зголемија за повеќе од 2 долара за барел, продолжувајќи го растот втор ден по ред поради намалените залихи на сурова нафта и зголемената побарувачка на бензин во САД.
Цената на барел нафта на лондонскиот пазар порасна за 2,09 долари на 108,71 долари, откако вчера поскапе за 2,22 долара.
На американскиот пазар цената на барелот се зголеми за 2,36 долари, на 99,62 долари, по вчерашниот раст од 2,28 долари.
– Вчерашниот раст на светските берзи, по зголемувањето на каматните стапки од страна на американската централна банка ФЕД и попуштањето на курсот на доларот, ја поддржа цената на нафтата. Тоа го поткрепуваат и официјалните неделни податоци на американската влада за резервите на гориво, изјави Тамас Варга од PVM Oil Associates.
Залихите на сурова нафта во САД минатата недела паднаа за 4,5 милиони барели, додека побарувачката за бензин во САД се зголеми за 8,5%, покажуваат податоците на американската Влада.
Во посебен извештај, Организацијата на земјите извознички на нафта (ОПЕК) денеска соопшти дека барел од нафтената кошничка на нејзините членки вчера изнесувал 108,11 долари, што значи дека е ослабел за 1,25 долари во однос на претходниот работен ден.
