Предводникот на Барселова откри дека утре тој и неговите играчи заедно ќе го гледаат натпреварот помеѓу Интер и чешкиот шампион Викторија, пред да истрчаат на „Камп Ноу“ против Баерн.
Барселона се моли чешките фудбалери да направат изненадување среде Милано и ако не да победат, барем да извадат нерешено против Интер. Таков развој на настаните ќе ја врати Барселона во игра за второто место и пласман во нокаут-фазата, откако во двата дуела против Интер каталонскиот клуб ниту еднаш не победи (пораз и реми).
„Натпреварот ќе го гледаме заедно во соблекувалната“, откри Чави Ернандес, пренесува Mundo Deportivo.
Доколку Интер ја победи Викторија ќе има 10 бодови и ќе ја одржи разликата од три бода во однос на Барса дури и ако Каталонците го изненадат Баерн. Тоа ќе значи дека Интер на коло пред крајот ќе се пласира во нокаут-фазата бидејќи и да загуби во последното коло тимот од Милано има подобар меѓусебен скор со Барса и поради тоа последното коло ќе му биде неважно. Затоа и Барса се моли во шампионот од Плзењ, градот познат по чешката пиварница Plzeňský Prazdroj, интернационално позната како Pilsner Urquell.
„Утре нашата цел е да одиграме добар натпревар без разлика на резултатот на Интер. Треба да докажеме дека можеме да се натпреваруваме со одредени противници“, додаде Чави.
Прашање е колку каталонскиот стратег ќе успее да ги мотивира своите фудбалери да одиграат одличен натпревар против баварскиот гигант доколку уште пред почетокот на натпреварот се знае дека се елиминирани.
Натпреварот Интер - Викторија се игра утре од 18:45 на „Џузепе Меаца“, додека по него, од 21:00 следува Барселона - Баерн.
