Репрезентцаиите од Европа и Јужна Америка најверојатно ќе бојкотираат доколку ФИФА донесе одлука Мундијалите да се одржуваат на секои две години, наместо како досега на четири.
„Мундијал на секои две години би го уништило фудбалот“, рече за The Times претседателот на УЕФА, Словенецот Александер Чеферин. Потоа ги критикуваше челниците на ФИФА кои своите намери ги изразија без претходно да се консултираат со континенталните федерации.
Запрашан како УЕФА ќе се однесува доколку оваа идеја ФИФА одлучи да ја реализира, Чеферин одговори:
„Веројатно ќе донесе одлука да не учествуваме“.
Со ваквите ставови на УЕФА се согласува и КОНМЕБОЛ, од фудбалската конфедерација на Јужна Америка.
Во овие моменти Светската куќа на фудбалот го разгледува и предлогот на Саудиска Арабија за промена на календарот на натпреварување, уште една револуционерна идеја со која УЕФА не се согласува.
Се работи за тоа да нема повеќе репрезентативни натпревари расцепкани во неколку прозорци ширум годината, туку цел октомври да се игра репрезентативен фудбал, а потоа во мај или јуни.
„Фудбалските федерации од Европа се против вакви планови кои би им нанеле одгромна штета на домашните првенства, кои, пак, се темелот на фудбалската индустрија. Новите натпреварувања, обновени или проширени на клупско и репрезенттаивно ниво не се решение за моменталните проблеми на нашата игра која веќе се дави во пренатрупан календар“, соопшти УЕФА.
Претседателот на ФИФА, Џани Инфантино, во средата најави дека постојат премногу бесмислени меѓународни натпреварувања и дека таквиот систем е нездрав за спортот, додавајќи дека новиот календар за фудбалските натпреварувања веројатно ќе биде воведен кон крајот на 2024 година, кога ќе заврши тековниот циклус.
