Македонскиот маратонец вчера уште еднаш испиша историја во македонската атлетика.
На неделниот маратон во шпанска Севиља, на кој на стартната линија се појавија преку 250 елитни маратонци од целиот свет со цел да исполнат норма или што подобар резултат за учество на Олимписките игри во Париз и Европското првенство во атлетика во Рим, меѓу нив беше и македонскиот најдобар атлетичар Дарио Ивановски.
Тој успеа да оствари извонреден резултат од 2:08:25, што е само 15 секунди до олимписката норма за Париз, што воедно представува и нов македонски рекорд и исполнета норма за учество на Европско првенство во атлетика во Рим.
Со овој резултат Дарио ќе скокне на ранг-листата за учество на Олимписките Игри во Париз, со што би требало да значи и обезбедено место за олимпискиот маратон во Париз.
Досегашниот македонски рекорд, кој Дарио го постави на 3 декември 2023 во Валенсија (Шпанија) изнесуваше 2 часа 11 минути и 53 секунди.
