Аргентинскиот напаѓач Пауло Дибала на својата презентација во Рома не го криеше задоволството од одлуката што ја донесе, а откако ја откри причината поради која решил да замине во Рим и да потпише за „Волчицата“, имаше посебни пофалби за тренерот Жозе Мурињо.
Дибала рече дека клучната причина поради која ја избрал Рома е всушност брзината и решителноста што ја покажале во потрагата по неговиот потпис.
После тоа рече дека се приклучил на тим кој е во подем, има цврсти темели за иднината и тренер со кој е привилегија да се работи.
„Деновите пред потпишувањето на овој договор беа полни со емоции. Брзината и одлучноста што ги покажа Рома сакајќи да ме ангажира ја направи разликата. Се приклучив на тим во подем, клубот има цврсти темели за иднината и тренер како Жозе Мурињо со кого е привилегија да се работи“, изјави Дибала.
После тоа изјави дека со нетрпение чека да настапи пред страсните навивачи на Рома.
„Кога тоа го истакнуваат сите противници на Рома, и јас ѝ се восхитував на атмосферата што ја создаваат навивачите на овој клуб. Сега, едвај чекам да им се претставам во овој дрес“, изјави Дибала.
Дибала во Рома ќе го носи дресот со број 21, а потсетуваме дека во дресот на Јувентус за 7 сезони одигра вкупно 293 натпревари на кои постигна 115 голови и запиша 48 асистенции. Претходно 3 сезони настапуваше за Палермо, кој во 2012 го донесе од Иституто де Кордоба, клубот каде ја почна кариерата.