Најскапиот пазар за недвижнини во светот ги присилува граѓаните на Хонгконг да живеат во бродски контејнери и бетонски цевки, и тоа легално.
Жилбер Вонг и неговата партнерка не ни помислувале дека ќе живеат во метален контејнер кога почнале да бараат стан. Меѓутоа, кога сфатиле колку се високи станарините, а уште поскапи цените на становите, биле присилени да се одлучат за „дом“ од 19 квадратни метри направен од метален контејнер.
За него месечно плаќаат околу 570 долари, а колку за споредба, за само една соба со истата големина во Хонгконг месечно се плаќа најмалку 20% повеќе.
Не може да се направи ни проценка колку вакви монтажни домови функционираат во Хонгконг во моментов, но се знае дека побарувачката расте. Нарачките за контејнери се двојно зголемени во споредба со 2016 година, а во 40% од случаите станува збор за станбен простор.
Компанијата Markbox, што се занимава со изградба на монтажни домови, годишно произведува околу 200 станбени контејнери. Овие домови најчесто се со површина од 30 квадратни метри и чинат околу 19.100 долари.
Сепак, и покрај релативно ниската цена, животот во контејнери секако има и негативна страна. Тие не се дизајнирани да издржат екстремни временски услови како тајфуни што се честа појава во ова подрачје.