Германскиот министер за социјални работи, Фолкер Висинг, рече дека овој потег е насочен кон намалување на штетните емисии, како и да им помогне на луѓето да се справат со кризата со зголемените животни трошоци.
Германија воведува единствен билет од 49 евра месечно за целиот превоз низ целата земја. Овој билет ќе важи за автобуси, трамваи и возови. Во текот на летото пробно беше воведен билет од 9 евра месечно, а новиот таканаречен Deutschlandticket ќе чини 49 евра месечно или околу 1,60 евра дневно.
Билетот важи за јавен превоз на кратки и средни релации по значително пониска цена од вообичаената. Засега се знае дека нема да важи на долги линии. Оваа картичка ќе биде дигитална, и ќе може да се обновува, како месечна претплата.
Единствената карта се воведува како начин за борба против растечката инфлација која е последица на актуелната криза во Украина. Покрај тоа, билетот треба да ги поттикне луѓето да користат еколошки транспорт и да ја намалат потрошувачката на гориво.
Веста за единствената цена на билетот за цела Германија е одлична вест за туристите. Од следната година ќе можат да ги посетат сите градови во целата држава со купување на еден билет. Слични акции веќе се преземени во други земји, како што е Шпанија, која воведува бесплатно патување со воз од 1 јануари 2023 година.
