Меѓународната фудбалска федерација (ФИФА) им го одзеде на Индонезија и Перу статусот на домаќини на Светското првенство во распон од само шест дена.
Минатата среда ФИФА ѝ го одзеде на Индонезија статусот на домаќин на Светското првенство за играчи до 20 години поради барањето на домаќините и на Ирак да не дозволи репрезентацијата на Израел да биде во групата со нивните селекции, а денеска стигна веста дека Перу остана без организацијата на Светското првенство за играчи до 17 години.
Северниот регион на Перу минатиот месец го зафатија обилни дождови среде циклонот Јаку, а ФИФА процени дека Перу нема соодветна инфраструктура за домаќин на првенството од 10 ноември до 2 декември.
ФИФА во најбрз можен рок ќе го објави името на новиот домаќин, а јасно е дека ќе мора да биде една од земјите во екваторијалната зона или на јужната хемисфера поради тајмингот на натпреварувањето.
