Српскиот тенисер Новак Ѓоковиќ се пласираше во осминафиналето на Австралија опен откако денеска го победи Бугаринот Григор Димитров (28. АТП).
Натпреварот траеше нешто повеќе од 3 часа, а на крајот беше 3:0 за Ѓоковиќ, по сетови 7-6, 6-3 и 6-4.
Новак одлично го започна натпреварот и веднаш направи брејк, а потоа без проблем го одржа својот сервис. Во деветтиот гем имаше дури три сет топки, но Григор успеа да се спаси. Потоа Бугаринот зеде брејк и го израмни резултатот, а потоа имаше две пропуштени сет прилики. По сето тоа се одигра тај-брејк во кој Ѓоковиќ по драмата подобро се снајде и поведе на овој дуел. Во финишот на сетот, на Ѓоковиќ му беше укажана лекарска помош поради повреда која ја заработи уште пред натпреварот и поради која имаше завои на ногата.
За разлика од првиот сет, во вториот немаше поголема драма освен во четвртиот гем, во кој Димитров трипати се спасуваше. Сепак, немаше спас за него кога следниот пат сервираше бидејќи Ѓоковиќ потоа направи брејк што беше доволно за да ја удвои предноста и да се доближи до победата.
Третиот сет на изгледаше речиси неверојатно. Започна одлично за Ѓоковиќ бидејќи направи два брејка и поведе со 3:0, а потоа го загуби сервисот. Следуваа два нови брејка на двете страни, па по таа серија лоши сервиси резултатот беше 4:2 за Новак. Еден од најдобрите тенисери на сите времиња до крајот повеќе не погреши и победи.
Ѓоковиќ во осминафиналето ќе игра против Австралиецот Алекс Де Минаур (24. АТП), кој денеска беше подобар од Французинот Бенжаман Бонзи (48. АТП).
До осминафиналето стигна и Русинот Андреј Рубљов кој славеше над незгодниот Британецот Даниел Еванс (30. АТП) по нешто повеќе од 2 часа тенис со 3:0, по сетови 6-4, 6-3, 6-3.
Противик на Рубљов во осминафиналето ќе биде Данецот Холгер Руне (10. АТП).