Иако проблемите за Huawei во последните денови стануваат сѐ поголеми, сепак компанијата реши да не чека повеќе и го претстави новиот модел од својот подбренд Honor, наречен 20 Pro.
Honor 20 Pro го претставува самиот врв на понудата на „буџетски“ телефони и е претставен како флегшип модел на брендот.
Дизајнот на 20 Pro го следи трендот на отстранување на „notch“-от од врвот на екранот, така што овој модел има селфи камера која се наоѓа под самиот екран, сместена во мало дупче во горниот лев агол од предната страна.
Honor 20 Pro пристигнува со процесор Kirin 980, во комбинација со 8GB RAM и 256GB внатрешна меморија за складирање на податоци. Уредот има Full HD+ екран со дијагонала од 6,26 инчи и резолуција од 2.340 х 1.080 пиксели. Овој смартфон користи посебна технологија за ладење со помош на листови од графен, кој ја одржува температурата на процесорот при континуирана употреба и играње игри.
Главниот адут на 20 Pro е неговиот систем од четири камери на задниот дел: главен сензор од 48MP, ултраширока камера од 16MP, телефото сензор со трикратен оптички и петкратен хибриден зум од 8MP и макро камера од 2MP. Дури и на предниот дел се наоѓа супермоќна камера од 32MP.
Телефонот го напојува батерија од 4.000 mAh, која се полни со брз полнач од 22,5W, а од компанијата тврдат дека се потребни само 30 минути за батеријата да се наполни до 50% од капацитетот.
За крај, телефонот ќе има оперативен систем Android, кој нема да може да се ажурира во понови верзии поради санкциите на Google кон Huawei. Цената на Honor 20 Pro изнесува 599 евра.
