Да се разбереме: листовите лоза не се лажни во овој рецепт. Финтата е што нема месо.
Сарма, мусака и турли тава се јадења со потекло од Отоманското Царство. Со текот на годините, овие јадења се етаблирале на балканските трпези и некои станале составен дел од традиционалната македонска кујна.
И додека сармите и други јадења се многу познати и секојдневни на трпезата и ден денес, има и такви традиционални јадења кои со текот на времето исчезнале, односно денес ретко се прават. Такво јадење е јалан долма.
Турците ова јадење го нарекуваат јаланги, што во превод значи „лажно“, затоа што не содржи месо.
Потребни состојки:
- 40 листови винова лоза
- 1 шолја ориз
- магдонос
- 2 кромида
- ½ шолја свежо нане
- 3 лажици масло
- вода
- сол
- бибер
Подготовка:
Во топла вода сварете ги лозовите лисја. На масло пропржете го оризот, додадете го кромидот и пржете додека не омекне. Додадете сечкан магдонос и нане, па прелијте со чаша вода. Откако ќе зоврие, исклучете, оставете на врела рингла за оризот да ја впие водата. Посолете и побиберете по желба. Изладете го филот и листовите, а потоа наполнете ги.
Околу филувањето, важно е во листовите да не се става поголема количина фил и да се завиткаат цврсто за да не пукнат и сармите да не се одмотаат. Потоа ставете ги во тенџере и оставете да зоврие, а веднаш потоа намалете на ниска температура. Гответе максимум 45 минути.