Ватерполо репрезентациите на Италија и Хрватска ќе се борат за златниот медал на Светското првенство во водени спортови во Доха, Катар. Италија во полуфиналето ја победи Шпанија со 8:6, а Хрватска во вистинска драма по 11:11 на пенали ја победи Франција со 6:5.
Европскиот првак Шпанија потклекна пред гранитната одбрана на Италија, предводена од голманот Марко дел Лонго. Благодарение на неовите интервенции, Италија во финишот на првото полувреме дојде до недостижна предност од 6:2. Шпанците успеаја да дојдат до 6:5, но до крајот Франческо ди Фулфио и Андреа Фондели постигнаа голови за конечен триумф на „Аѕурите“.
Голманот Дел Лунго со 12 интервенции беше најдобар играч на натпреварот.
Во второто полуфинале Хрватите се изнамачија со најпријатното изненадување на турнирот, селекцијата на Франција.
Се чинеше дека Хрватска лесно ќе избори место во финалето кога во последниот период влезе со предност од три гола (9:6). Но, во последната четвртина Французите целосно се вратија во игра. При резултат 10:10, Франција не искористи напад со играч повеќе, а на 52 секунди до крајот Лорен Фатовиќ им донесе предност на Хрватите. Франција израмни на 18 секунди до крајот кога Хас постигна гол.
Во пенал серијата Хрватите ги погодија сите шест пенали, додека кај Французите трагичар беше Хас чиј удар голманот Мате Аниќ го одбрани во шестата серија.
Финалето ќе се игра в сабота од 15:30 часот по македонско време.
