Во зима луѓето се повеќе изложени на инфекции и поминуваат помалку време надвор, што е една од главните причини зошто во зимските месеци се зголемува ризикот од недостаток на витамин Д во телото.
Овој витамин, кој се создава во кожата по изложување на сончева светлина, е неопходен за добро здравје. На сите ни е потребен витамин Д за да бидеме здрави и да се бориме со инфекции, а иронијата е што во зима, кога на луѓето им е најпотребен, повеќето од нив не го добиваат доволно, пренесува The Conversation.
Витаминот Д понекогаш се нарекува „витамин на сончева светлина“ бидејќи се произведува во кожата по изложување на сонце. Истите УВ зраци кои често предизвикуваат опасни изгореници создаваат и витамин Д. Заштитата од сонце, потемната пигментација на кожата, облеката и намалената дневна светлина во зима ја намалуваат способноста на кожата да создава витамин Д, а луѓето кои доживуваат најголеми сезонски промени во нивоата на витамин Д се оние со светол тен и кои живеат на места каде што во зима има многу малку дневна светлина.
Имајќи предвид дека витаминот Д ни помага во борбата против потенцијалните инфекции, како и за намалување на воспаленијата, експертите предупредуваат дека е исклучително важно да се внесува доволно од овој витамин во зимските денови. Ова се некои од начините:
- исхрана богата со витамин Д (масна риба, туна, скуша, сардини, печурки, млечни производи)
- престој на отворено
- земање додатоци со витамин Д
Со оглед на тоа дека на луѓето им треба повеќе витамин Д во зима, бидејќи добиваат најмала количина од него, постои дебата за тоа колку точно витамин Д треба да консумираат здравите возрасни лица во текот на денот. Некои експерти препорачуваат од 200 IU дневно до 2000 IU дневно. Во САД, Институтот за медицина препорачува 600-800 IU дневно за возрасни, додека Ендокриното здружение наведува дека за оптимален статус на витамин Д може да бидат потребни 1500-2000 IU дневно. Во зима, луѓето имаат намалена способност да создаваат витамин Д кога излегуваат надвор, така што количините од најмалку 600 IU дневно на витамин Д од храна или додатоци би помогнале да се одржат нивоата на витамин Д на летните нивоа.
Но, исто како и многу други работи, премногу витамин Д исто така може да биде штетен. Поради ризикот од рак на кожата, дерматолозите и другите здравствени работници не препорачуваат незаштитено изложување на сонце за да се зголеми нивото на овој витамин. Наместо тоа, тие предлагаат да се јаде храна збогатена со витамин Д, како и да се земаат суплементи. Секако, нагласуваат дека е важно да се земаат пропишаните дози.
Експертите кои го одредуваат националниот внес на витамин Д препорачуваат возрасните да земаат не повеќе од 4.000 IU витамин Д дневно за да избегнат можни токсични несакани ефекти. Витаминот Д ни помага да го апсорбираме калциумот од нашата исхрана, но кога неговото ниво во телото е превисоко, нивото на калциум во крвта се зголемува, што може да доведе до заболување на бубрезите.
