Некои од големите авиокомпании веќе соопштија дека патниците мора да носат маска за лице на летовите за да се спречи ширењето на новиот коронавирус во „новата нормала“ што веќе се спроведува во земјите ширум светот.
Американските авиокомпании неделава ќе ги соопштат новите мерки и препораки за заштита на здравјето и безбедноста на патниците и екипажот на лет. Други авиопревозници ширум светот исто така ќе го направат носењето маски на лет задолжително кога ќе се рестартира патничкиот авиосообраќај.
Иако околу 90% од меѓународните летови се откажани, авиокомпаниите се надеваат дека авиосообраќајот ќе почне постепено да се враќа уште во мај.
Американската авиокомпанија Delta вчера соопшти дека патниците ќе мора да носат некаква прекривка за лицето во делот за чекирање, во премиум лаунџ просториите, на терминалите за бординг, како и цело време во текот на летот.
American Airlines и United исто така соопштија дека носењето некаква маска ќе биде задолжително, како за патниците, така и за екипажот на лет. Авиопревозниците велат дека ова се привремени мерки во периодот на рестартирање на летовите.
„Прекривките за лице ќе бидат задолжителни за сите патници и компанијата ќе обезбеди бесплатни маски за патниците“, изјави Меди Кинг, портпаролка на United Airlines.
Сепак, има авиокомпании кои нема да воведуваат задолжително носење маска. Qantas соопшти дека „во Австралија носењето маска не е задолжително“, и дека „ни Владата, ни авиокомпаниите уште немаат донесено одлука за тоа какви мерки ќе има откако ќе се укинат забраните за патување“.
Австралискиот национален авиопревозник на својата веб-страница објави:
„Иако ризикот од заразување со новиот коронавирус во авион се смета за низок, на сите летови ќе се спроведува строго социјално дистанцирање.“
Поголемите авиокомпании веќе спроведуваат најстроги мерки за чистење и дезинфекција на површините и местата каде има најголема концентрација на луѓе и летаат со намален број на патници на секој лет. На патниците им се препорачува да носат своја храна и пијалаци на лет за да се намали контактот со други лица.
Нискотарифната авиокомпанија Wizz Air уште од 1 мај најави дека ќе мора екипажот и патниците да носат заштитни маски, да се одржува физичка дистанца пред чекирање, како и при влегување и излегување од авион, а на летови каде што ќе има можност ќе се обезбеди и оддалеченост помеѓу седиштата на патниците.