Претседателот на Барселона, Жоан Лапорта, не ги обвини Лионел Меси и неговиот татко што на крајот одлучија Аргентинецот да ја продолжи кариерата во редовите на американскиот Интер Мајами, иако, како што се тврди, тој веќе постигнал договор со каталонскиот клуб.
Лапорта изјави дека Барселона секогаш ќе биде дом на Меси, а раскажа и како пропаднала првично склучената зделка и која била вистинската причина за заминувањето на Меси во американската МЛС.
„Имаме добри односи со Меси, но не сме разговарале откако тој се пресели во Интер Мајами. Му посакуваме сѐ најдобро во МЛС, и нека знае дека Барселона секогаш ќе биде негов дом. Нашата врска заврши во моментот кога тој отиде во Париз, потоа се обнови кога го договоривме неговиот трансфер, но двете страни не можеа да се договорат и да го постигнат тоа што го сакаа“, изјави Лапорта и продолжи:
„Дали Меси некогаш повторно ќе игра за Барселона? Мислам дека ситуацијата овде е многу комплицирана. Мораме да го прашаме. Тој имаше идеја да се врати и ни се допадна, Чави, Управниот одбор на Барселона и јас сакавме повторно да го видиме во дресот на Барселона, но не успеавме да се договориме. Меси многу се грижи за себе, има исклучителен талент и секогаш може да покаже фудбал на највисоко ниво, но сепак мислам дека можеме без него“.
Тој додава дека зделката била направена, но на крајот сепак во клубот дошол неговиот татко и ја пренел информацијата дека Меси го избрал Интер Мајами.
„Договорот беше целосно договорен, но неговиот татко Хорхе сакаше да дојде и да разговара со мене. Тој ни кажа дека Лионел го избрал Интер Мајами бидејќи поминал тешки сезони во Париз, каде што бил ставен под голем притисок и дека во МЛС ќе му биде помирно. Иако сакаше да се пресели во Барселона, не сакаше да помине уште една таква година“, нагласува Лапорта.
Минатата сезона Меси одигра вкупно 32 натпревара во Лиг 1 за ПСЖ, постигна 16 гола и додаде 16 асистенции.
