Катастрофа за домаќинот на Копа Америка: САД испадна со сите 11 играчи од Големата петорка

Фудбалерите на Соединетите Американски Држави доживеаја елиминација во групната фаза на Копа Америка на која се домаќини, а не им помогна ниту тоа што дојдоа со сите свои ѕвезди во надеж дека ќе се борат за трофејот.

Репрезентацијата на САД од година во година напредува, но сепак се збогуваа уште во најраната фаза на Копа Америка. За работите да бидат уште попогубни за домаќинот на ова натпреварување, од групата се пласираше една Панама, која по играчки кадар не може да се споредува со САД.

Подобра од САД во третото коло од групната фаза беше селекцијата на Уругвај, која славеше со 1:0 и со тоа од првото место и со сите 9 освоени бодови се пласираше во нокаут фазата на Копа Америка. Единствениот гол на натпреварот беше дело на Матиас Оливејра од 66. минута.

Понатаму оди и селекцијата на Панама, која со лесни 3:1 беше подобра од Боливија, со што го зазеде второто место со 6 бода, пред САД кои освоија само 3. Хосе Фахардо во 22. минута отвори за Панамците, а израмни Бруно Миранда во 69-тата. По 10 минути Едуардо Гереро го врати водството, а печат на победата стави Сесар Јанис во 3. минута од надополнувањето. Боливија без бодови се прости од натпреварувањето.

На САД не им помогна тоа што нивниот тим беше составен од стартни 11 играчи кои играат во лигите на европската Голема петорка. Лидери се Кристијан Пулишиќ од Милан и Вестон МекКени од Јувентус, а има пет играчи од англиската Премиер лига, тројца од италијанската Серија А, двајца од германската Бундеслига и еден од француската Лиг 1.

Сепак, пресуден за елиминацијата на САД беше поразот од 2:1 од Панама во второто коло кога по само 18 минути игра „Јенките“ останаа со играч помалку по крајно наивниот потег на Тимоти Веа, синот на легендарниот Жорж Веа, кога со бокс удри противнички играч. САД, иако со десетмина, успеа да поведе, но Панама потоа направи пресврт.

Така, сега знаеме 7 од осумте патници во четвртфиналето. Понатаму поминаа Аргентина, Канада, Венецуела, Еквадор, Уругвај, Панама и Колумбија, а вечерва се очекува Бразил, кој игра токму против растеретената Колумбија, дополнително да го потврди пласманот за што му е доволен и бод.