Северна Кореја е подготвена да ги мобилизира своите нуклеарни сили, соопшти Ким Џонг Ун.
За време на говорот по повод годишнината од Корејската војна, севернокорејскиот лидер рече дека земјата е целосно подготвена за секаков вид воен конфликт со САД, објави државната новинска агенција KCNA.
САД предупредија минатиот месец дека Северна Кореја ја подготвува својата седма нуклеарна проба.
Последниот ваков тест беше одржан во земјата во 2017 година. Сепак, во меѓувреме има зголемување на тензиите на Корејскиот Полуостров, пишува BBC.
Специјалниот претставник на САД во Северна Кореја, Сунг Ким, рече дека земјата тестирала досега невиден број проектили оваа година - 31, во споредба со 25 во 2019 година, што е рекордна година за такви тестови досега.
Во јуни, Јужна Кореја одговори на оваа ситуација и лансираше осум свои проектили.
Министерот за обединување на Јужна Кореја, задолжен за меѓукорејски прашања, во вторникот рече дека постои можност за тестирање околу годишнината од примирјето, иако воен претставник рече дека нема непосредни знаци за тоа.
Северна Кореја најверојатно ќе се соочи со посилни санкции, вклучително и мерки насочени кон нејзините капацитети за сајбер напади, доколку продолжи со тестирање, изјави вчера министерот за надворешни работи на Јужна Кореја.
Иако Корејската војна (1950-1953) заврши со примирје, Северна Кореја тврди дека ги победила САД. Секоја година го слави Денот на победата со воени паради и огномет.
Во својот говор по повод настанот, Јонг-ун рече дека поради американската нуклеарна закана, Северна Кореја мора „итно да ја исполни историската цел за зајакнување на својата самоодбрана“.
Во говорот, Ким рече дека Вашингтон продолжува со „опасни, незаконски непријателски акти“ со Јужна Кореја против Северот и се обиде да го оправда своето однесување со демонизирање на земјата.
Северна Кореја долго време ги обвинува Соединетите Американски Држави за двојни стандарди во нивните воени активности и за водење непријателска политика кон Пјонгјанг, велејќи дека го спречува продолжувањето на разговорите насочени кон ставање крај на нуклеарната и ракетната програма на земјата во замена за олеснување на санкциите.
„Двојниот чин на САД, кој ги прикажува сите рутински дејствија на нашите вооружени сили како провокација и закана додека одржуваат големи заеднички воени вежби кои сериозно ја загрозуваат нашата безбедност, е буквално грабеж“, рече Ким..
Севернокорејскиот лидер, исто така, се чинеше дека се осврнува на извештаите дека Јужна Кореја има намера да го оживее планот за спротивставување на севернокорејската нуклеарна закана со извршување превентивни напади.
Станува збор за јужнокорејската воена програма Kill Chain (смртоносен синџир), која е насочена кон откривање на заканата од лансирање ракета од Северна Кореја и преземање превентивен напад. Некои аналитичари предупредуваат дека тоа носи одредени ризици и може да предизвика трка во вооружување.
Ким Џонг Ун на прославата на Денот на победата рече дека владата и војската на јужнокорејскиот претседател Јун Сук-Јол ќе бидат избришани доколку тој изврши превентивни напади.