Австралискиот тенисер Ник Кирјос откри уште детали околу неговата борба со менталните болести, откако во втората сезона од „Break Point“ на Netflix објасни дека се пријавил во психијатриска болница во Лондон по Вимблдон во 2019 година бидејќи размислувал за самоубиство.
„Искрено размислував за тоа дали сакам да се самоубијам“, вели Кирјос во шестата епизода на серијата, која официјално ќе биде објавена на 21 јуни.
Тој загуби во четири сета од Рафаел Надал во второто коло, но поразот му паднал многу тешко.
„Загубив на Вимблдон. Се разбудив и мојот татко седеше на креветот и плачеше. Тоа ме разбуди. Знаев дека не можам да продолжам така. Завршив на психијатрија во Лондон за да се обидам да ги решам моите проблеми“, вели Кирјос.
28-годишниот Кирјос вели дека сега ја има менталната стабилност за разлика од периодот кога злоупотребувал дроги и алохол. Тој годинава ја пропушти Австралија опен поради повреда на коленото, по што доби повреда на стапалото кога неговиот автомобил Tesla беше украден минатиот месец, по што го прескокна и Ролан Гарос. Вчера тој се врати на тенисот на Штутгарт опен, каде што загуби од Ву Јибин.
