Антонио Конте удри по своите играчи откако Тотенхем ремизираше со последнопласираниот Саутемптон во Премиер лигата.
Беше бесен по киксот во кој неговиот тим загуби со 1:3 и одигра 3:3, се нафрли на играчите, но и на клубот, па му претстои отказ. Веќе е познато која е првата желба на клубот за неговата функција.
„Гледам себични играчи, гледам играчи кои не сакаат да си помагаат и не играат со срце. Пред натпреварот ја криев таа ситуација, сакав да разговарам со играчите приватно за да се обидам да ги подигнам, но сега морам да кажам дека овој тим нема волја и желба да постигне успех. Тоа треба да го покаже во секој момент. Секој од нив“, изјави Конте по кобното реми и додаде:
„Клубот има одговорност за она што го прави на пазарот на играчи. Секој тренер кој работел овде има одговорност за резултатот. А играчите? Што е со играчите? Каде се играчите? Имаме 11 играчи кои играат за себе, каде е нивната одговорност?"
„Ние сме професионалци. Клубот ни плаќа големи плати. Тие заработуваат пари, јас заработувам пари за оваа работа, разбирате? Не се платени за да бараат изговори, да не покажуваат желба и да немаат одговорност. За мене ова е неприфатливо затоа што првпат во кариерата се наоѓам во ваква ситуација“, продолжи тој, па удри и по клубот:
„Играчите се навикнати на оваа ситуација. Тие не играат за ништо важно. Тие не сакаат да играат под притисок, не сакаат да играат под стрес, вака им е полесно. Тоа е приказната за Тотенхем. 20 години го имаат овој сопственик и никогаш не освоиле ништо. Зошто? Дали е виновен клубот и секој тренер што работел таму? Ги видов тренерите кои Тотенхем ги имаше на клупата, очигледно дека не се.
Молчев до сега, но веќе нема да молчам. Ова не е фер кон нашите навивачи, ова што го одигравме денеска е неприфатливо. Овие луѓе нè следат, купуваат билети за да го видат тимот и потоа го добиваат ова. Мораме многу внимателно да размислиме за тоа“.
Англиските медиуми пишуваат дека Конте после се е подготвен да добие отказ и дека клубот ќе му врачи отказ оваа недела. Се знае и кој треба да го замени.
Според германските медиуми, тоа би требало да биде Оливер Глазнер, тренерот кој минатата година го предводеше Ајнтрахт до титулата во Лига Европа.
Австрискиот стручњак се споменуваше и како еден од кандидатите за наследник на Карло Анчелоти на клупата на Реал.
