„Лајт“ верзијата на Спутник V против COVID-19, дадена во единечна доза, ја намалува можноста од инфекција за 50 до 60 проценти, изјави Александар Гинцбург, директор на рускиот Национален истражувачки центар за епидемиологија и микробиологија „Гамалея“, кој ја разви вакцината, пренесуваат руски медиуми.
„Има ‘лајт’ (light) опција, која е првата компонента на вакцината Спутник V. Ако се користи одделно, без примање на втора доза, овозможува намалување на можноста за инфекција за 50 проценти, па дури и за 60 проценти“, рече Гинцбург за Россия-1.
Испитувањата на вакцината Спутник лајт која се дава во единечна доза, започнаа во Москва на 27 февруари, а пријавата за нејзина регистрација беше поднесена на 29 март.
Спутник V даден во две дози останува главната вакцина.
Стручното списание Lancet објави дека Спутник V е 92 проценти ефикасен во превенција на симптоматската болест и 100 проценти во спречување на тешка форма на болеста COVID-19.
Руската вакцина исто така се смета за ефикасна против новите варијанти на коронавирусот.
Руската вакцина против COVID-19 Спутник V е една од трите што моментално се тестираат во Европската агенција за лекови (ЕМА), заедно со вакцините на американскиот Novavax и германскиот CureVac.
Експертите на агенцијата се очекува да ја посетат Русија во април за да го испитаат производството и складирањето на вакцината.
