За пазарот на телевизори компанијата LG подготви нов екран за домашно кино Direct View LED (DVLED), а најскапиот модел има вртоглава цена.
Новите екрани се достапни во различни големини, од голем 108-инчен HD до огромен 325-инчен 8K панел кој чини неверојатни 1,7 милиони долари. Овој екран тежи нешто повеќе од 900 килограми. LG порано резервираше вакви екрани само за комерцијални клиенти, но сега ги продава на секој што има доволно длабоки џебови.
Со оглед на големината, новите DVLED екрани за домашно кино нема да можат да се вклопат во сите домови, а ова ограничување е значително поврзано со технологијата за прикажување што ја користат. Наместо да користат LCD слој за да создадат пиксели и да ги осветлуваат со посебни LED диоди, овие нови екрани користат само LED диоди (во некои случаи помали MicroLED), нешто слично како со понудите The Wall на Samsung и Crystal LED на Sony. Ова е предност при создавање на повисоко ниво на контраст во споредба со онаа на OLED екраните, бидејќи индивидуалните пиксели можат целосно да се исклучат за да се создаде подлабоко ниво на црна боја. Предизвикот е да се направат LED диодите доволно мали за да функционираат како индивидуални подпиксели, и затоа овие први DVLED екрани во моментов се толку големи.
Новите DVLED екрани на LG може да се гледаат како замена за проектори кои создаваат слика од 100 инчи или поголема. DVLED технологијата е поскапа, но таквите екрани сѐ уште можат да се користат без проблеми во добро осветлени простории, за разлика од повеќето проектори кои бараат темна средина. Светлината на повеќето LG екрани е 1.200 кандели на квадратен метар, што може да се спореди со стандардните понапредни телевизори.
Повеќето екрани нудат стандарден формат 16:9, но LG продава и верзии од 32:9 во случај да сакате да гледате две видеа едно покрај друго.