Германската канцеларка Ангела Меркел ја повлече одлуката за дополнителни ограничувања што требаше да бидат воведени за Велигден по острите критики за таа одлука, информираа денеска учесниците на состанокот на канцеларката со покраинските премиери.
Меркел им рекла на учесниците на вонредно закажаната средба дека договорот, кој таа и премиерите го постигнаа вчераутро, за мерките што требаше да важат за Велигден, а кои предвидуваа повеќето продавници требаше да бидат затворени и да биде дополнително ограничен бројот на луѓе на семејни средби, нема да се спроведе.
Критиките за договорот беа првенствено дека, и покрај маратонските разговори меѓу канцеларката и покраинските премиери, клучните елементи на договорот всушност останаа нејасни.
Германски бизнисмени и претставници на индустријата тврдат дека за нив е нејасно што всушност значат мерките за затворање на Велигден во пракса.
„Згрешив“, беше цитирана Меркел.
Многумина сметаа дека затворањето од 1 до 3 април ќе беше тешко да се спроведе во пракса.
Засега е непознато дали има алтернативен план за спречување на силниот трет бран на пандемијата на COVID-19.
Федералните и провинциските влади на Германија се согласија да ги продолжат локдаун мерките до 18 април и ги повикаа граѓаните да останат дома пет дена за време на велигденските празници за да го разбијат третиот бран на пандемијата, соопшти канцеларката рано во вторникот.
На разговорите доцна во ноќта, Меркел ги повика лидерите на 16 германски покраини да заземат поостар став во борбата против пандемијата, преиначувајќи ги плановите за постепено отворање на економијата, договорени претходно овојмесец.
Од друга страна, германските граѓани сѐ повеќе се незадоволни од мерките за штедење, а владејачката Христијанско-демократска унија (ЦДУ) на Меркел доживува голем пад на популарноста пред изборите во септември.