Лионел Меси, Ерлинг Холанд и Килјан Мбапе се неверојатно блиску по бројот на гласови за победникот на овогодинешната Златна топка, потврдија организаторите на оваа реномирана манифестација.
„Оваа година е тесно... многу, многу е тесно“, беше пораката на главниот уредник на France Football, Венсан Гарсиа, кој денеска го коментираше гласањето за Златната топка 2023 меѓу Меси, Холанд и Мбапе.
France Football, се разбира, претседаваше со престижната награда во поголемиот дел од својата историја.
Тројца играчи се водечки кандидати за овогодинешната награда Златна топка. Меси го освои Светското првенство со Аргентина, а Холанд го предводеше Манчестер Сити до тројната круна (Премиер лига, ФА куп и Лига на шампиони).
Во меѓувреме, Мбапе постигна хет-трик во мундијалското финале за Франција, иако не беше крунисан за шампион, и ја освои Златната копачка на првенството во Катар.
За потсетување, добитниците на главната награда во машка и женска конкуренција, како и за различни споредни почести, ќе бидат откриени утре на церемонијата на доделувањето на Златната топка 2023, која ќе се одржи во театарот и оперска куќа „ду Шатле“ во Париз.
Меси 7 пати ја има освоено Златната топка (2009, 2010, 2011, 2012, 2015, 2019 и 2021), најмногу од било кој. Холанд и Мбапе ја бркаат својата прва ваква награда.
