Откако со аргентинската репрезентација го освои Светското првенство во Катар, популарноста на Лионел Меси се вивна во облаци во Аргентина, а според тамошните медиуми, според актуелната статистика, тој дури би победил и во трка за претседател на државата.
Името на Меси секако е вклучено во многубројните навивачки песни со кои се слави неговиот успех со аргентинската репрезентација и сето она што тој го правеше во играчката кариера, но најновите податоци кои доаѓаат од оваа земја покажуваат дека неговата популарност уште повеќе порасна.
Во анкетата која беше објавена на социјалните мрежи, Меси е убедлив лидер во хипотетичката трка за претседател на Аргентина и со 36,7 отсто од гласовите е далеку пред Хавиер Милеи и Кристина Киршнер.
Аргентинските медиуми пишуваат и дека мнозинството од испитаниците ја поддржале одлуката на играчите да не одат во претседателската палата по победата, а 82 отсто од нив рекле дека е подобро играчите да ги избегнат политичките церемонии.
Потсетуваме, Аргентина го освои светскиот шампионат на крилата на Меси за прв пат по 36 години, а во финалето ја победи Франција по подоброто изведување пенали.
