Дефанзивецот на Ливерпул Дејан Ловрен ги напушти редовите на англискиот првак по шест години и одлучи да замине во Русија.
Триесет и едногодишниот Хрват стана играч на Зенит, а неговиот досегашен клуб се збогува од него преку социјалните мрежи, посакувајќи му сѐ најдобро во понатамошната кариера.
Заминувањето на Ловрен особено тешко го погоди Мохамед Салах, кој стана близок пријател со Хрватот откако дојде на Енфилд во 2017 година.
Салах сними видеопорака во која емотивно се збогува од колегата и пријател, како на теренот, така и надвор од него.
„Не знам што да кажам, пријателе. Не знаеш како се чувствувам во моментов. Навистина ќе ни недостигаш на сите, ама особено мене.
Ми беше неверојатен соиграч и одличен пријател. Многу ќе ни недостигаш. Ми недостигаш и многу те сакам. Беше фантастичен на теренот и надвор од него.
Ти благодарам за сѐ што направи за клубот, ти благодарам за сѐ што направи за мене. Ти посакувам сѐ најдобро во иднина и ти посакувам успешна кариера, да уживаш во новиот клуб и со твоето семејство.
Ти благодарам многу и се гледаме наскоро“, рече Мо.
Ловрен дојде во Ливерпул во 2014 година од Саутхемптон и настапи 154 пати за овој клуб. Стана и англиски и европски шампион, но последните две сезони немаше многу шанси за игра, па реши дека е најдобро да замине од Енфилд.
Зенит на Ливерпул му плати околу 12 милиони евра, а Ловрен со клубот од Санкт Петербург потпиша тригодишен договор.