Фудбалерот за врска на Реал Мадрид Лука Модриќ, кој беше прогласен за најдобар играч на реванш осминафиналниот натпревар од Лигата на шампионите против Аталанта (3:1, прв натпревар 1:0), рече дека се чувствува подмладено.
„Тренерот побара од нас да притиснеме повеќе. Ова е она што го направивме. Ова ни даде доверба. Се чувствувам како пак да имам 27 години. Не размислувам за мојата возраст. Не се важни бројките во пасошот, туку играта на теренот. Сè уште сум гладен да се борам на највисоко ниво и да работам секој ден за да останам тука. Сега беше важно да се пласираме во четвртфиналето по две сезони кога бевме елиминирани порано. Можеме да одиме многу далеку“, истакна Модриќ.
Триесет и петгодишниот хрватскиот репрезентативец во Реал Мадрид е од 2012 година.
И шпанска Marca не штедеше пофалби за Хрватот:
„Дон Лука Модриќ ѝ одржа лекција на Аталанта. Уште една. Беше величествен во првото полувреме, ја контролираше играта и го олади силниот старт на италијанскиот тим и ја претвори грешката на противникот во прекрасна асистенција за Бензема за водство од 1:0. На 35-годишна возраст, тој игра со интензитет на многу помлад играч и зрелост на некој кој веќе ја има Златната топка“.
Marca уште додава дека Модриќ е „фудбалски учебник“ и дека играл, асистирал, шутирал и освојувал топки „како никогаш досега“.
„Реал Мадрид може да продолжи да сонува со него. Тој е генијалец“, заклучува Marca.