Најбогатиот фудбалер во светот, Фаик Болкија од Брунеи, заработи тешка повреда која долго ќе го оддалечи од фудбалските терени.
Внукот на султанот од Брунеи настапува за Ратчабури во тајландската Премиер лига и тешко се повреди по дуел со противнички фудбалер и итно беше префрлен во болница каде беше опериран.
Болкија (25) се повреди откако влезе како замена на полувремето против Полис Теро на стадионот „Буњачинда“.
Претседателот на Ратчабури, Танават Нитиканчана рече:
„Денеска е најтажниот ден. Мојот брат, принцот Фаик Џефри Болкија, беше повреден додека играше за нас. Знам дека си во шок и во многу болки во моментов, но знај дека ќе бидеме со тебе на секој чекор додека не се вратиш и повторно ќе даваш голови. Иако си со нас само осум месеци, сигурен сум дека си сакан од сите во клубот и од навивачите. Ќе го чекаме денот кога ќе се вратиш посилен од кога било, момче“, изјави првиот човек на тајландскиот клуб.
Болкија, чие семејство има богатство од 20 милијарди евра, од почетокот на кариерата е на надолна патека.
Како член на семејството на султанатот Брунеи, тој дојде преку младинската академија на Челси, Саутемптон и Лестер, но не успеа никаде да се пробие до првотимскиот статус. Во 2020 година, тој ја побара среќата во португалски Маритиму.
Но, таму не успеа да се наметне, но не сакаше ниту да ја заврши кариерата. Ја прифати поканата од далечниот Тајланд и реши да почне од нула.
Она по што е познат и овој фудбалер е неговото второ хоби, а тоа е дека сака да игра фудбал со своето „милениче“ - тигарот.
